Айни дамда Шаржада машғулот ўтказаётган "Пахтакор" таркибида Камолиддин Тожиев ҳам бор. Ўзбекистон миллий терма жамоаси вакили бўлган футболчимиз жароҳат олганлиги боис, Осиё чемпионатига бора олмаганди. Ҳозирда якка тартибда машғулот ўтказаётган Тожиевларнинг ўртанча вакили билан жамоанинг расмий веб сайти мухбири қисқача суҳбатлашди.
- Жароҳатингиз тузалиб қолдими?
- Ҳа, ҳозирда ўзимни анча яхши хис этяпман. Яна беш кундан сўнг умумий таркиб машғулотларига қўшиламан. Ҳозирча ўзим югуриб турибман.
- Жамоадошингиз Одил Аҳмедов бугунда терма жамоамизнинг марказий ҳимоясида ҳаракат қиляпти...
- Менимча Одил ўзига билдирилган ишончини тўлиқ оқлаяпти. У анча йиллардан буён ҳимоя чизиғида тўп тепган футболчиларга ўхшаб беҳато тўп тепяпти. Ҳужумга қўшилишни ҳам канда қилмаган ҳолда ўз ҳисобига иккита гол ёзиб қўйди.
- Кўпчилик учун кутилмаганда терма жамоамиз Осиё Кубогида энг яхши жамоалардан бири бўляпти, бунга нима дейсиз?
- Нима учун кутилмаганда? Бугунги кунда Ўзбекистон миллий терма жамоасининг таркибида энг кучли ўйинчилар йиғилганлар. Терма жамоа бош мураббийи Ўзбекистоннинг энг яхши ўйинчилари бир ерга жамлай олди.